اجمل قصة حب |سليم

0
قصص حب| سليم
قصص حب| سليم

قصص حب| سليم 


اليوم سنستعرض في موقع المحقق قصة من قصص حب عربيه ، وهي من احسن قصص الحب ، وهي من تصنف من قصص حب ووجع ، فهذا النوع من قصص حب رومانسية يجعلك تدخل بداخل القصه لانها قصه كالمحادثه ، واذا رأيت ان الروايات عن الحب هذه تعجبك لا تنسي مشاركة هذه ال قصص رومانسية ، هيا لنبدأ فالقصه تحت تصنيف " قصص حب " ننتظر تعليقك في اخر القصه ...

قصص حب

-لا يا ماما انا مش هتجوز غير سليم وياريت مالك دا متجيبيليش سيرته تاني لإني بطيق العما ولا اطيقهوش 
=يابنتى فكري بعقلك واركني قلبك دا ع جنب شويه ، الحب مش كل حاجه والجواز عشرة عمر خدي اللي يصون العشره 
-وماله سليم يا ماما انا بحبه وهو كمان بيحبنى وعايزني وجه اتقدم اكتر من مره 
=سيليم دا مش شبهنا وبصراحه كدا انا مش مرتحاله 
-يا ماما يا حبيبتى والله سليم طيب جدا وابن ناس بطلي القلق اللي انتى فيه دا ووافقي عليه عشان خاطري 
=بس...
-مفيش بس انتى مش يهمك راحتي وانى اكون مبسوطه 
=وانا هعوز ايه اكتر من كدا يابنتى
-خلاص وافقي عليه بقى 
=امري لله ، طب ومالك اقوله ايه انا دلوقتى 
-قوليله كل شيء قسمه ونصيب
'كلمت سليم عشان يجيب اهله ويجي يقابل بابا كنت فرحانه جداً ، لا دانا كنت طايره مش مصدقه ان ماما خلاص وافقت بعد كل المحاولات دي، انا بحب سليم جداً وهو كمان بيحبنى ، قرينا الفاتحه ولبسنى الدبله ، بعد فتره من الخطوبه لقيته مش بيتعامل معايا زي الاول وكنت بقنع نفسي انه مشغول وغصب عنه مع ان دا مكنش سهل عليا ابداً انا اتعودت ع اهتمامه بكل تفاصيلي فكرة انه يتغير عليا دي صعبه جداً ، عاتبته كذا مره ع دا وف كل مره كان بياكل عقلي بكلمتين حلوين ، وبصراحه انا هبله وبحبه فبسكت انا مجرد مبشوفه بس او اسمع صوته بنسى اي حاجه مزعلانى منه 
-تقدر تقولى مبتسألش عليا ليه !
=يافرح يا حبيبتى انتى عارفه انى برجع من الشغل تعبان وعارفه الضغوطات اللي عليا 
-مانت من يومك مشغول ومن يومك عليك ضغوطات مكنتش بتهملنى ليه ! ولا انت زهقت !
=حد يزهق من روحه برضو !
-لا متثبتنيش بلسانك الحلو دا عشان مش هيجيب معايا سكه 
= طب وهو انا بعمل كل دا ليه مش عشان نتجوز 
-امممم ، طيب انا قولتلك اهو وعاتبتك عشان متزعلش من رد فعلي بعد كدا 
'قفلت معاه ، وكنت خلاص هنام بس سمعت صوت ماسج فتحت الموبايل لقيت رساله ع الواتس من رقم غريب ، فتحتها لقيت صورة سليم مع واحده ومكتوب تحتها خطيبك اهو اللي فرحانه بيه ، بعت مين اللي بيتكلم ، قالي مش لازم تعرفي مين المهم انك تعرفي الحقيقه وع فكره لو سألتيه مش هيقدر ينكر وجربي ، قفلت الموبايل وانا مصدومه ، معقول بيخوني ! طب ليه دانا وقفت قصاد الدنيا كلها عشان خاطره اخرتها يعمل فيا كدا ! فضلت ابكي ومكنتش عارفه اعمل ايه اسكت عشان بحبه ولا اروح اواجه ، ف الاخر قررت انى هواجه بالكلام دا ، اتصلت بيه وقولتله اني جياله المكتب وروحتله '
-تقدر تقولي مين دي ! 
=انتى جبتى الصوره دي من فين 
-رد عليا زي مبكلمك 
= اصل.. دي اكيد فيك 
-لا مش فيك يا سليم تعرف ليه ! عشان انت عمرك مهتتعدل ولا هتبقى بني ادم 
=ايه اللي بتقوليه دا
-هو انت فاكر اني عشان بحبك هفضل ساكته ع قرفك وتصرفاتك دي كتير ! ملعون الحب ياخي اللي يرخص حد كدا ، انت متستاهلش انى اكون مراتك اصلاً ، انا غلطانه انى مسمعتش كلام ماما من الاول 
=يا فرح افهمينى ادينى فرصه اشرحلك 
-مانا ياما اديتك فرص عملت بيها ايه ، انت فاكر اني مش هقدر اكمل من غيرك ! لا غلطان والله محدش حياته بتقف ع حد ولو هتقف ياسيدي انا راضيه ارحم من قلة القيمه اللي انا فيها معاك دي ، دبلتك اهي ومش عايزه اشوف وشك تانى 
'خرجت من المكتب وانا مقهوره ، مش عارفه رايحه ع فين كنت عايزه اصرخ من الوجع ، ازاي انا كنت راضيه بكل دا ، كنت فاكره ان اللي بيحب حد بيتغير عشانه بس اللي فيه داء مش بيبطله ، ياريتنى عملت بكلام ماما وركنت قلبي ع جنب ، فضلت اتكلم مع نفسي كتير كدا ومكنتش شايفه قدامي ، لحد مخبطتني عربيه ، فقدت وعيي ومحستش بأي حاجه بتحصل ، اخدوني ع المستشفى ودخلوني ع اوضة العمليات '
-انا فين ، وايه اللي حصل 
=انتى ف المستشفى يا فرح عملتي حادثه بس الحمد لله جات سليمه 
-انت بتعمل ايه هنا 
=مهو انا مقدرش اشوفك ف الحاله دي ومجيش اطمن عليكى 
-فين ماما 
=ثوانى هندهالك 
خرج مالك عشان ينده ماما ، معرفش ايه جابه هنا ، انا مكنتش بطيقه عشان هو بيحبنى وانا مش بحبه فهو كدا لما حد يحبك وانت متحبوش بتحسه تقيل ع قلبك ووجوده شيء مش مرغوب نهائي ، بس الحاله اللي كنت فيها مكنتش تسمح بأي حاجه كنت حاسه نفسي مدشدشه ع ميت حته وقلبي واجعنى ' 
-حمد الله ع السلامه يا فرح يابنتى
=الله يسلمك يا ماما ، شوفتى سليم عمل فيا ايه ؟ شوفتى بعد كل اللي عملته عشانه عمل ايه ! 
-ايه اللي حصل 
=بيخوني ياماما ، منه لله انا عمري مهسامحه ع كسرة قلبي دي 
-مش انا قولتلك اني مش مرتحاله ، وقولتلك ان الحب مش كل حاجه 
=انا اسفه ياماما 
-المهم انك بخير ،يغور ف داهيه انتى خساره فيه اصلاً
=الدكتور قال ايه وهخرج امتى
-هاا الدكتور لا مقالش حاجه 
=ماما متخبيش عليا الدكتور قالك ايه ، وانا كنت ف العمليات ليه ؟ 
-كان عندك نزيف جامد وكان لازم يشيلو الرحم 
=ايه !! انتى بتقولى ايه ياماما ! يعنى انا مش هبقى ام طول عمري ، دا كتير اووي عليا والله دا كتير انا مقدرش استحمل كل دا 
'فضلت اعيط واصرخ لحد م مالك نده ع الدكتور عشان يدينى حاجه تهدي اعصابي ، مالك مسبناش لحظه من ساعة مدخلت المستشفى ، كنت بستغرب ازاي هو كدا برغم ان عمره مشاف منى غير الوش الخشب والتقطيم ف الرايحه والجايه ، بس افتكرت لما ماما كانت بتقولى ان مالك اصيل وابن ناس خدي وفعلاً اللي حصلي اثبت انه اصيل ومحترم ، ع عكس سليم اللي مفكرش يسأل عليا بعد اللي حصل ، خرجت من المستشفى ورجعت البيت ، بدأ اتحسن شويه شويه ، لحد مأثر الحادثه راح ، لقيت ماما داخله وقعدت جنبي 
-فرح ، كنت عايزه اكلمك ف موضوع كدا 
=خير يا ماما
-انا كبرت وعايزه افرح بيكي قبل ماموت او تحصلي حاجه 
-بعد الشر عليكي ياماما وبعدين مين هيرضى بواحده مش بتخلف مين هيقبل ميكونش اب 
=مالك ، مالك يابنتى بيحبك وشاريكي بمال الدنيا وعارف كل اللي حصل وراضي وبيقول مش عايز غيرك 
-انا مش هظلمه معايا ياماما 
=يابنتى العيال دي رزق من عند ربنا ، ورزقك محفوظلك لو مأخدتهوش عيال هتلاقيه ف راجل ابن حلال يصونك ويحافظ عليكى ، هتلاقيه ف رضا ربنا ، هتلاقيه ف اي حاجه تانيه ، احمدي ربنا ع كدا ووافقي عشان خاطري ، خدي اللي بيحبك هتسعدي عمرك كله 
=بس انا مبحبوش ياماما 
-وخدتي ايه من اللي حبتيه ، مالك بيحبك وانا متأكده انه هيشيلك ف عنيه الاتنين 
=بس.. 
-وافقي بقى متتعبيش قلبي 
'خرجت ماما بعد مقولتلها اني موافقه ، الفتره اللي تعبت فيها دي غيرت تفكيري ف مالك حسيته راجل وانه فعلا ابن اصول ، بقيت بقبله شويه بعد مكنت مش بطيقه ، جه هو واهله وكتبنا الكتاب وبعدها بكام يوم عملنا الفرح ' 
-انا مش مصدق نفسي ، معقول بقيتى بتاعتى انا بس ، معقول بعد السنين دي كلها بقيتى مراتي ، الحمد لله يارب الحمد لله انا مش عايز حاجه تانيه من الدنيا خلاص ، وهعوز منها ايه وانا معايا الدنيا 
=مش هتندم ع القرار دا! مش هتيجي ف يوم تعاملنى بطريقه مش كويسه ! 
-وهو انا بعد دا كله اقدر اعمل كدا ، هتبتر ع نعمة ربنا ، انتى الحاجه الحلوه الوحيده اللي حصلتلي ولو فضلت عمرى كله احمد ربنا عليكي مش هوفيه حقه عليا 
'كلامه طمني وريح قلبي ، كنت بتعامل معاه كويس بما يرضي الله يعنى لكن قلبي ماملش ليه ، احياناً كنت بسيبه وانام ، واوقات كنت بروح عند ماما واسيبه لوحده ف الشقه ، واوقات مكنتش بعمل اكل مع انه بيرجع تعبان من بره ، لكن عمره موبخني بالكلام ولا رفع صوته عليا كان بيعاملنى كأني بنته ، عدت الايام وفضلت عايشه معاه كنت حاسه انى ف جنه من كتر الراحه والدلال اللي شوفته معاه كنت بقول ازاي في حد بالجمال دا ، لكن برضو كنت بصده كتير عمري مقولتله انى بحبه كنت ديماً بقنع نفسي بعكس الكلام دا ،لحد مفيوم حد اتصل عليا وقالي ان جوزك عمل حادثه ، كنت عامله زي المجنونه مش عارفه اعمل ايه حسيت كأن حد ضربني بسكينه وان روحي بتروح مني ، لبست ونزلت اجري لحد موصلت للمستشفى 
-طمني يادكتور بالله ، مالك عامل ايه دلوقتى 
=مخبيش عليكي الحاله خطيره ، ادعيله ربنا يلطف بيه ويقوم بالسلامه 
-لو مفيش امكانيات هنا ، انا ممكن اسفره ف اي مكان المهم يقوم ويبقى كويس 
=هنا زي بره ، احنا هنخرجه من العمليات وهندخله العنايه المركزه وباذن الله خير 
-طب ممكن اشوفه عشان خاطري 
=للاسف مش هينفع قبل 24 ساعه 
'مكنتش مستوعبه اللي بيحصل ، فضل ادعي ربنا انه يشفيه ويقوملي بالسلامه ، حسيت اني ضايعه ، وان ممكن اموت لو مالك حصلتله حاجه ، انا مليش غيره ، فضلت مستنيه 24 ساعه بقرأله قران وبدعي وببكي ، حالتي كانت تصعب ع الكافر زي مبيقولوا ، بعدها الدكتور قالي ممكن اشوفه بس مطولش جوه عشان لسه حالته مش مستقره ، دخلت ومكنتش قادره اشوفه ف الحاله دي جريت عليه ومسكت ايده وفضلت اعيط '
-مالك ، رد عليا عشان خاطري ، متسيبنيش لوحدي انا مليش حد ف الدنيا غيرك ، محدش وقف جنبي ولا سندني غيرك ، انا اسفه انى كنت انانيه اووي ، اسفه ع القسوه اللي كنت بقابل بيها حبك ليا ، اوعدك هتغير وهبقى واحده تانيه بس انت قوم ، عشان خاطري مش انت بتحبنى طب اللي بيحب حد بيسيبه ويمشي ! قوم بقى متوجعش قلبي انا ملصمه نفسي بالعافيه 
=فرح ... فرح 
-انا هنا انا معاك اهو جنبك مش هسيبك ابداً ، انا غبيه مكنتش حاسه بالنعمه اللي انا فيها ، بس خلاص انا فوقت ، خليك معايا واوعدك ان عمري مهزعلك ف حياتى 
=انا.. انا مش زعلان منك ، كفايه عليا املى عيني من ملامحك مش عايز اكتر من كدا 
-مالك 
=نعم
-انا بحبك وهفضل احبك لحد منتقابل ف الجنه 
=بتقولى ايه ! 
-بقولك بحبك 
=يا وعديييي....

"واخشى أن يصيبنى حبك " 💙

استعرضنا في موقع المحقق قصة حب من قسم " قصص حب " وهذه روايات حب من تأليفنا ، فاذا اعجبتك قصة الحب هذه فلتشاركها مع اصدقائك وتابعني اول باول ، واترك لنا جمله تشجعنا لنقوم بتاليف روايات حب كاملة ، اترك لنا تعليقك ، ولا تنسي قراءة القصص الاخري في قسم قصص حب ...


لا يوجد تعليقات

أضف تعليق