روايات عن الحب| مجنونتي

0

روايات عن الحب| مجنونتي

روايات عن الحب

اليوم سنستعرض في موقع سمو الامير قصة من قصص حب عربيه ، وهي من احسن قصص الحب ، وهي من تصنف من قصص حب ووجع ، فهذا النوع من قصص حب رومانسية يجعلك تدخل بداخل القصه لانها قصه كالمحادثه ، واذا رأيت ان الروايات عن الحب هذه تعجبك لا تنسي مشاركة هذه ال قصص رومانسية ، هيا لنبدأ فالقصه تحت تصنيف " قصص حب " ...

" مجنونتي " قصص حب وغرام 

-مش عارفه والله يا هند هبطل امتى الهبل اللي انا فيه دا واتعامل مع الواقع 
=هبل!! انتى عديتى المرحله دي خلاص ، ممكن نقول عته ،تخلف ، جنون حاجه ف الرينج دا يعنى 
-انتِ صحبتي انتِ! انتِ الكونفرت زون اللي بيقولوا عليها !! دانتِ بير احزان وبيطفح ف وشي انا بس 
=اصل انتِ غريبه بصراحه يعنى ايه جايه تقوليلي انه قالك ف خيالك " اول شي بونسوار ، تاني شي تتجوزيني"!! ، يعنى انتى جايه تشاركي ف التريند ف دماغك ! طب بالله عليكِ دي عمايل اللي بتعمليها فيا دي .. يا شيخه اتجي الله 
-يعنى التريند معجبكيش ! عادي انا ممكن اغيره عادي يعنى مثلاً ممكن نخليها انه قالي " اديني جاي بحلفلك ان انتى ماليه العين واني مشيت جيتلك معرفش رايح فين يكش تقبلي اكون بطل الفيلم بقى ونخلص " ايه رأيك حلو كدا ! 
=يارب انت الحنين ع الغلابه يارب انا مش حمل اللي بتعمله فيا دا ، بصي يا فريده يا حبيبتى انا بس عايزه اوضحلك حاجه صغننه قد كدا 
-خير يارب 
=مبيحبكش تمام !! وانتِ مش ف دماغه وهو قالك دا خمسوميت مره ،ممكن بقى نهدا ونركز ف مستقبلنا اللي كله سواد ف سواد وتركني عم الزفت دا هنا شويه 
-انا طلعت مهزأه فعلا انتوا مبتكدبوش ، طب مهو غصب عني طيب قلبي جايبلي الكافيه لا عارف ياخد موقف ولا عارف يريح نفسه وانا اللي ف النص بينهم حقيقي عايزه اخلص من احساسي دا كله بس مش قادره 
=مفيش حاجه اسمها مش قادره ، هنحاول وهتتجاهلي احساسك دا لحد ميضيع منك خالص ووقتها مش هتدوري عليه 
-ياريت يا هند والله ، عشان عذاب القلب مش هين والله 
=كل دا هيخلص قريب بس المهم دلوقتى انا كلاب بطني بتهوهو من الجوع ف ها 
-كلاب بطنك ! انتِ عديتى ليفل العصافير خلاص ! هو انا ايه اللي ممشينى معاكِ لا بجد ايه 
=عشان شبح ف نفسي ومفيش مني اتنين ولو سبتينى مش هتلاقي صاحبه قمر زيي وكدا يعنى 
-قولتيلي .. طب انا بقول اقوم اروح قبل مرميكي تحت عربيه هنا ويبقى اجلك جه ع ايدي
=طب والاكل طيب 
-شششششش 
'سبت هند واخدتها مشي لحد البيت ، كنت مخنوقه جدا او دا العادي يعنى لأنى كل مبفتكره او اتكلم ف الموضوع قلبي بيوجعنى وبضايق ، حقيقي احساس انك تحب حد وهو ميحبكش شيء مؤذي جداً والمؤذي اكتر ان مشاعرك وضعفك يبانوا قدام الشخص دا فتلاقي ميكس من انه لا مش هيضعف ويبادلك نفس الشعور وانك صعبان عليه فتلاقيه لان ف الكلام مع رمي كام كلمه ف النص اللي هو لأ مش هينفع احبك ، المهم انا وماشيه المطر نزل لقيتنى ببكي وبدعي بحرقه وقولت يارب انا خلاص تعبت من كل اللي جوايا دا محدش شاايل كل دا ف قلبه وانا مش عارفه ابوح لغيرك ف يارب شيله من قلبي انا خلاص مش عايزاه بس شيله من قلبي انزع كل الحب اللي جوايا دا واحفظه للي يقدره ، انا قلبي يستاهل يتحب ويتعافر عشانه يارب ريحني بقى ، وصلت البيت غيرت وصليت ومحستش بنفسي غير وماما بتصحينى اتغدى ، '
-فريده 
=ايوا يا ماما 
-قومي يابنتى اتغدى المغرب ع اذان وانتِ من ساعة مجيتى نايمه 
=يا خبر هو انا نمت كل دا 
-ايوا ياختى وانتِ بتعملى حاجه غير النوم 
=لا قبل متكملي المحاضره بتاعة كل يوم قايمه اهو خمس دقايق وهتلاقينى بره ع السفره 
-ههههههه طب متتأخريش 
"قومت غسلت وشي بسرعه وخرجت لماما عشان نتغدى صحيت وانا حاسه بشعور غريب كدا مكنتش عارفه دا ايه ، بس كان حاجه كدا مبين ان عندى طاقه انى ابدأ من جديد ومابين انى اتخلص من الحاجات اللي بتتعبنى حتى لو روحي متعلقه بيها ، اكلت ورجعت اوضتى تانى صليت المغرب ولقيتنى مسكت الموبايل وفتحت الواتس ' 
-احمد 
=نعم 
-كنت عايزه اتكلم معاك كلمتيين كدا فلو مش فاضي قولي وابعتلك وقت تانى 
=ياستى لو مش فاضي افضالك وهو انا عندي كام فريده 
'لا بلاش كدا عشان مضعفش وابوظ الدنيا يخربيتك ، يارب ثبتنى ع موقفي يارب' 
-مش هيكون عندك ولا فريده 
=ليه انتى مسافره راس البر من غير متقولى 
-بطل الش بس
=حاضر هبطل بس قوليلي في ايه 
-في انى تعبت من علاقتنا دي ، هي ممكن تكون مريحاك انت وجايه ع هواك انت ومهونه عليك انت برضو لكن انا عكس كل دا 
=ايه ايه ايه هو انا زعلتك ف حاجه طب ضايقتك من عير ماخد بالى 
-لا انت واخد بالك كويس ، بص ياحمد انا قلبي شايفك حاجه وانت شايفنى حاجه تانيه خالص وانا قلبي مش ملكي حاولت كتيير انى اتجاهله واتعامل بشكل طبيعي بس معرفتش مش قادره اخليه يبطل يفكر فيك او يبطل يحنلك ، فانا هحط نهايه لكل دا وحالاً 
= فريده ، انتِ غاليه عليا اوي وربي انتِ مش متخيله انتِ بالنسبالي ايه 
-عارفه زي اختك 
=طب وهو في اغلى من كدا 
-ملوش لازمه كل دا دلوقتى ، اسمعنى بس ممكن 
=حاضر 
-انا مش هعرف ابطل احبك ومش هعرف برضو اكرهك مش متخيله اصلا انه يحصل ، بس ممكن اعمل حاجه ع الاقل تهدي النار اللي جوايا دي شويه ، انا هبعد عنك خالص ، نبعد البنزين عن النار عشان الامور تستقر ، مهو مش هينفع اللي انا فيه دا طب فرضاً اتجوزت ازاي هقدر احب جوزي وانا بحبك ، اكيد هو ميستاهلش مني كدا ، انا همشي خالص واكيد ربنا هيريح قلبي واموري تتحسن 
=بس انا مش عايزك تمشي ، خليكِ هنا المشكله بس انى خايف ومش عايز اخد خطوه نندم عليها ، لكن انا عايزك انا مليش غيرك 
-لا ياحمد كدا اسمها انانيه انت عايزنى زي مانت عايز وانا مش قادره اتعامل بالشكل دا ، نهايته اشوفك ع خير خلي بالك من نفسك وتأكد انى بدعيلك وهدعيلك مع السلامه 
'كتبت كل كلمه بدموعي تقريباً معرفش جاتنى من فين القوه انى اعمل كدا ، بس يمكن دي دعوتي وربنا استجابها ، مسحت دموعي وقولت لنفسي من ترك شيئاً لله عوضه خيراً منه وان اصلاً علاقتى بيه كانت عصيان لله فعشان كدا ملقيتش منها راحه ، واكيد طالما انا نويت ارضي ربنا هيساعدنى والجهد اللي هبذله عشان اعيش وهو مش ف حياتى ربنا هيؤجرنى عليه اضعاف اضعافه ، قررت انى هبدأ من جديد مع ربنا ومع نفسي وهحاول اشغل نفسي بحاجات كتير عشان الموضوع يكون سهل عليا' 
-وحشنى يا هند والله 
=وحش لما يلهفك
-طب براحه طيب مش كدا الله 
=مانتِ هتتعوجي هظبطك 
-ايه جو بتوع التكاتك دا
=هو كدا اعترضي بقى
-لا ياستى امرى لله ، انا بس بفضفض معاكِ انتِ عارفه مش سهل عليا اللي عملته دا ، متخيله بقالى 6 شهور بعيده !! 6 شهور معرفش عنه حاجه ومش بحاول اعرف ، ايوا تعبت كتير بس بدأت اتأقلم انه مش هنا يلا بقى ربنا يسهله 
=هتخلينى اعيط وانا احساسي مرهف وقلبي ضعيف وكدا ومبستحملش 
-مين اللي مرهف دا! يابنتى انتِ جبله اصلاً مبتحسيش 
=الله يسامحك 
-طب ايه رأيك ف الخمار النهارده حلو صح انا عارفه انه حلو متقوليش حاجه 
=صبرني يارب ، بس تعرفي يابت يا فريده الخمار محليكِ بجد مخليكى ليدي كدا زي باقي البنات 
-احم صحبي الرشاش اللي مبيفضاش
=تقدري تنسي اللي قولته خالص، قال ليدي قال 
'عدا 6 شهور وانا بجاهد كل ليله عشان مضعفش وارجعله تانى فابدأ من الصفر كنت بستعين بالله ع احساسي دا كل يوم كنت عامله ورد يومي وبقيم الليل وبستغفر كتير وكله بنية ان ربنا يثبتنى ويجبر قلبي ومرجعش للصفر تانى ، ف يوم كنت نايمه ف لقيت الموبايل بيرن الساعه 6 كنت هقفله وانام تانى بس لقيت الرقم مصمم وبيرن كتيير فرديت '
-فريده معايا
=ايوا انا
-احمد عمل حادثه وهو ف المستشفى دلوقتى ياريت تيجي 
=انت بتقول ايه !! احمد لا مش ممكن 
-اهدي بس هبعتلك عنوان المستشفى متتأخريش ارجوكِ 
' قفلت معاه كنت زي المجنونه ، مش متخيله ان حاجه وحشه تحصله مش متخيله انه يكون مش موجود ف الدنيا حتى لو بعيد عنى او مش معايا ، يارب لأ يارب متأذينيش فيه ، جريت ع الحمام غسلت وشي وغيرت هدومي ونزلت حتى مقولتش لماما انى نازله ، روحت ع المستشفى وسألت عليه فدلوني ع الاوضه ' 
-احمد فين ! طب هو كويس ، بالله طمنوني احمد جراله ايه 
=اهدي بس باذن الله ربنا هيقومه بالسلامه هو دلوقتى ف العمليات والدكتور قال ساعه وهيخرج وينقلوه ع العنايه المركزه ادعيله كتيير ، قبل ميدخل العمليات قالي اكلمك 
' قعدت وفضلت اعيط وادعي كتير وطلعت المصحف وفضلت اقرأ لحد مخرج من العمليات وشوفته داخل العنايه ، الدكتور قال ان ممكن ندخل بس ع الاقل بعد 5 ساعات فضلت مستنيه وانا ع اعصابي اول مره اخاف ع حد بالشكل دا واول مره قلبي يتوجع كدا ، فضلت استغفر لحد مدخلتله '
-انت كويس ! رد عليا عشان خاطري ، طمني عليك ، مش عايزاك تحبنى ومش عايزه حاجه خالص بس قوم بالسلامه ، ازاي يعنى متبقاش موجود ، حتى لو كنت مش ف حياتى كفايه انى حاسه بوجودك حواليا انا كنت بتكلم معاك كل يوم ف دعايا ، كنت غايب بس مبتغبش ، قوم بقى متوجعش قلبي اكتر من كدا 
'لقيته بدأ يفتح عينه وايده بتتحرك جنبه ' 
-فريده 
=ايوا انا فريده ايوا 
-كنت فاكر اني مش هشوفك تانى 
=بعد الشر عليك اديك قومت بالسلامه وهتبقى كويس متقلقش 
-طب كنت عايز اقولك حاجه 
=ممكن ترتاح ولما تقوم بالسلامه تقول اللي انت عايزه 
-لأ هقول دلوقتى
=حاضر قول بس متضغطش ع نفسك 
-اول شي .. 
=بنسوار ، وتانى شي ؟!! 
-تتجوزيني ! 
=عيد المشهد تانى كدا معلش 
-طيب بلاش دي يا ستى ، ادينى جاي بحلفلك ان انتى ماليه العين وانى مشيت جتلك معرفش رايح فين ، يكش تقبلي ابقى بطل الفيلم بقى ونخلص 
=انت عيان ! 
-اومال بشم هوا هنا 
=قصدى التعب مأثر عليك وكدا 
-التعب فوقنى 
=طب...
-شششششش

"غارقةٌ بك وكلما عزمت النجاه ازددت غرق وغرقي بكَ نجاه ..!💜"

استعرضنا في موقع سمو الامير قصة حب من قسم " قصص حب " وهذه روايات حب من تأليفنا ، فاذا اعجبتك قصة الحب هذه فلتشاركها مع اصدقائك وتابعني اول باول ، واترك لنا جمله تشجعنا لنقوم بتاليف روايات حب كاملة ..
من قسم " قصص حب " ...

لا يوجد تعليقات

أضف تعليق